بصراحة من فترة نفسى اكتب الرسالة دى

بس كنت بعالج مرارتى من الانفقاع عقبال السامعين

هتقولولى يا مواطن وايه اللى فقع مرارتك ؟؟؟!!!!

هقولكم طبعا وانا اقدر اخبى عن موقعنا حاجة

خير اللهم اجعله خير

قال ايه كنت راكب فى المترو ولقيت جنبى واحد بيقرا فى جرنال

فعملت عبيط وقعدت اقرا بنص عين الاخبار المكتوبة

وقال اية الاقى فى الصفحة الاولى فى الجريدة الرسمية الاولى خبر بيقول

مظاهرة تقيمها فتيات الطبقة الراقية

قلت أكيد عايزين يقيموا مظاهرة علشان إحساسهم بإن النبى إتهان .........

ولا علشان الناس الى فوق تتلحلح شوية وتشوف حل لقضية القدس....

اللى حمضت من الانتظار فى الملفات

ولا حتى تشوف حل لمطبات الشوارع ولا الغلاء ......

ولا فاتورة التليفون الجديدة ولا يمكن لتحرير العراق المغتصب ارضة ونسائه ....

ولكن فوجئت إنى مواطن مش عايش فى الدنيا

وانى متاخر تلاتة مليون سنة على الاقل عن الاحداث الجارية

ورحت ضارب بعينى فى السطر الاولانى فى الخبر إقرا بقى

وقلبى فرحان أن تحرير المرأة جاب فايدة

الخبر بيقول إيه؟؟!!!

فتيات الطبقة الراقية فى مصر عاملين المظاهرة بالعربيات بتاعتهم.....

ورافضين اى واحدة تروح من غير عربية

قلت وماله هما برضة الطبقة الراقية

مش معقول هيبقوا زينا ويمشوا على رجليهم

وكمان دول بنات يعنى السترة ليهم افضل جوة العربية

علشان الطوب والدبش واى خناقة فى المظاهرة برضة

ولان الموضوع منظم ودى صورة مصر قدام العالم

فلازم نبقى عالم شيك افهموها بقى

بكمل بقية الخبر..... لقيتهم كاتبين

على كل فتاة تشترك فى المظاهرة انها تجيب اتنين بوستر للنجمين

قلت نجمين اية يكونش مصر بقى فيها وكالة فضاء زى ناسا بتاعة ماما امريكا

قعدت اضرب اخماس فى اسداس .....

وقلت أكيد الموضوع ليه علاقة بخسوف الشمس ولا كسوفه اللى حصل ....

واللى احتفلوا بيه...

بأنهم جابو رقاصة ترقص فى مرسى مطروح وقت الكسوف

ففهمت لية الشمس اتكسفت .......

بس الصراحة مش عارف إيه علاقة الهشك بشك بالكسوف الشمسى ؟؟؟؟!!!!!

المهم رخمت على الراجل صاحب الجرنال

وركزت بعينى فى الصفحة علشان افهم لية المظاهرة

تتوقعوا بقى ليييييييييييييييييية المظاهرة ؟؟؟؟؟!!!!!

اقولكم ولكن خلو بالكم

قسم المرارة المفقوعة مليان على الاخر بالشعب المصرى والشعوب المجاورة

فكل واحد يحافظ على مرارته

تصوروا السبب الرهيب

فتيات الطبقة الراقية تقيم مظاهرة بالسيارات امام القسم

المحجوز فية المطرب الشاب تامر حسنى والمطرب هيثم شاكر

بعد ان ثبت ان احدهم زور شهاداته الرسمية والاخر هارب من التجنيد ومزور الشهادة

ويشترط لحضورالمظاهرة ان تاتى الفتاة بالسيارة

وان تلصق بوسترين للنجمين على الزجاج الخلفى للسيارة

واى فتاة لن تفعل هذة الشروط لن يعتبروها متظاهرة معهم

انتهى الخبر

اة والله العظيم مش بهرج ولا بكدب

مصر ام الدنيا يا نااااااااس

كفاياكم رجعية وتخلف

ان مكانش هيتظاهروا علشان تامر حسنى هيتظاهروا علشان مين وعلشان اية ؟


نفسى افهم اية الى هيحصل فى المظاهرة دى ؟


هيرعبوا قوات الشرطة بالكلاكسات ويعملوا بيب بيب ؟؟؟

وهتافات ياى ياى تامر ياى ياى هيثم هيا دى المظاهرات ؟؟؟ ياى ياى تومة .... ياى ياى ثومة

حتة عيل تافة والتانى اتفه منه يتعمل عليهم كدة ؟؟؟؟

هيا دى القضايا الى شاغلة عقل بناتنا ؟؟؟؟؟

هيا دى البنات الى مفروض هتطلع وتربى اجيال زى صلاح الدين ومحمد الفاتح ؟؟؟؟

هيا دى البنات الى مفروض نص المجتمع ؟؟؟؟؟؟؟؟؟

خلاص بقى تامر حسنى وهيثم والى على شاكلتهم ابطالنا ؟؟؟؟؟؟؟؟؟

انا متصور منظر قوات الشرطة المساكين

وهما بيتحدفو بالبسكويت الى بيعور

كانت الاصابات بالغة خاصة من البسكويت الى محشى عجوة كان فتاك


انا نفسي اعرف ليه المظاهرات دي علي ناس المفروض انها تتعاقب ؟؟؟
المظاهرات تبقي علي واحد زي ايمن نور المظلوم الي اتطس 5 سنين ظلم
وربنا علي المفتري والحكومة....

منقوووول

ملحوظة : الموضوع كتب باللغة العامية المصرية لذا فمن يجد صعوبة فى فهم اى كلمة فأنا على استعداد للترجمة المجانية .....

سلاااااااام