وأشوفك فوق جبين الشمس طالعة تصبحي
وأشوفك بين نجوم الليل تلالي وتمرحي
تتمرجحي
بين الجفون
جوا العيون .. ويا السهر
يا اللي حنانك
أغلى هدية من القدر
يا أم العيون السود
بتحلم بالأمان
فاردة قلوعك
سابقة خطاويكي الزمان
ومين يقدر على مهرك؟
غير اللي الحب في قلبه
غناوي
كلها بإسمك
وطاير فوق دروب الشوق بمواله
وفيه رسمك
لو ان المهر يا حلوة
كنوز الأرض؟
ترخصلك
دا انا عاشقك يا متعاجبة
ومستني ف يوم أنسى
سنين الهجر والغربة
وأشوفك ف السما نجمة
تضوي فوق جبين الشوق
وتحلالي
واحط الكلمة ع الكلمة ف موالي
واغنيلك
يا ساكنة القلب من يومك
يا وهبالي سمار نيلك
ولسة احلامي وردية
بتسري ف دمي وعروقي
تزيد اللهفة من شوقي
أعيش بكرة على ذوقي
لا واجبي انساه
ولا حقوقي
وأشوف شمسه مضوية
تهل ف ساعة صبحية
تنور لي خطى طريقي
واعيش وياها ف البساتين
مع الياسمين
تكون مركب ف بحر أمين
وانا القبطان
ويوم ورا يوم
حنيني يزيد
ونار الشوق ف قلبي تقيد
لفجر جديد
ينور سكتي وداري
يكون الضلة ف نهاري
وطول ليلي
يكون قنديل
يكون لي دليل
ف كل سبيل
ولا آجي ف يوم أبات حيران
وحلمي وحلم أجدادي
وأولادي
يعيش ويايا بين يدي
ومين قدي
لو اقدر يوم أكون ملاح
أكون فلاح
تعيش الدنيا من كدي
ونفسي م السماح نابعة
تصير ف الضلمة نور شمعة
تنورها
وتبقى الوحشة بيا أمان
وانا الإنسان
وللباطل
أكون سجان
أكون عنتر أبو الفرسان
ف إيدي السيف
ولا اعرف خوف
يكون قلبي
حليم غضبان.