ارخي لي حبل المشنقهْ
من قبل ما الروح اللي خانقاني تبات مطَّلَّقه ْ
عديت سنيني الأربعين .... باربع سنين
وشوية اِيَّام مرفقه ْ
والحبل شادد فوق رقبتي ...
اللي اتولدت لقيت عروقها معلَّقَّه ْ
يا عم عشماوي ... عليك ألفين مبارك ...
قلعة الخوف اللي مبنيَّه سنين فوق الضلوع مِتْرَسْتَقَه
عشرين سنة ... زوِّد عليها سبع سنين غـُلب وشقا
والضلمه من بين الضلوع متضفَّره ومتعشَّقه
وسهام عزيمتي طول سنين شنقك بقت متفرَّقه
وسنان غيلانك جوّه لحمي مرشّقه
هوَّه في مشنوق يمُصُّه ف دمه ؟ عيب
مش تبقى جـُرْسَه ومهزأه ؟ !!!
مستكترين مقتول يطلَّع نكته بايخه ...!!!؟
يرثي حاله يموت عليها بتريقه ؟ !!!
مش ناقصه منك شد تاني ...
فوق رقبتي ... ارحم بقى !!!
يا ريت تسيب لي نَفـَس أخير ...
ينفعني في قبري اللي مستني الُّلقا
ما تخافش مني . عروقي دِبْلِتْ ...
مش ها تتشدِّ العروق ف المغرقه
امتى هاتفهم إني لاجل سواد عينيك نفسي أروح المَحْرَقه
وهاسيبها ليك متخضره ... ومتعشَّره ...
مش ناوي أعيش تاني وأشوف ...
نسلك بيورث دمي فوق حلقة ضفيرة المشنقه
ارحم بقى