لا تعاتبني لغلطه قلت لك عنها بنفسي
يعلم الله ما نويت اجرحك او قصدي خصامك

تعرف اني يالغلا سلمت لك مفتاح همسي
كيف ترسل لي من اسراري على قلبي سهامك

وش تبي من ما بقي مني !! تراني عايش امسي
كيف ترضى .. تسرق افراحي .. ويجلدني كلامك !

يا ظلالي في هجير الصيف وفي البرد شمسي
يا ملبسني من اخلاقك رِدا .. يكفي ملامك

ما لعمري وزن من غيرك وعيا الهم يرسي
يعلم الله وش كثر مهزوم واترجى سلامك

شف على وجهي علامات الندم تصبح وتمسي
شف عسى قسوة عجاج الدهر تسترعي اهتمامك

رد لي صبري .. عساي اصبر على ساعات نحسي
لين يفرجها عظيم الشان .. واتقلد وسامك

ما اشجعك تصرخ بوجه الضيم .. لا تنبت بغرسي
ما اروعك .. راسك رفيع الشان ما ينهز هامك !!